مابين الدراما الكورية والانمى اليابانى والافلام الهندية ^^

سؤال شغل بال ناس كتيير ولانى عادة مش بشرح لحد او بفشل فى الموضوع ده تقريبا ..:) بس يبقى السؤال الدائم
بعديا عن كونى انسانة غريبة غير مفهومة ..مليش اتجاه محدد مليش حاجة معينة بحبها ..لا اتعلق بشئ معين
انا عامة بحب التطلع واجرب الحاجات الجديدة ومش مدمنة لحاجة معينة ..وبيعجبنى حااااجاااااااات كتيير ^^
السؤال هو اشمعنى مسلسلات كورية وافلام هندى وانمى يابانى ؟؟ ليه ده من دولة ..ايه الفرق مانا ممكن اقول اه الكورى واليابانى والهندى مفيش احسن منهم ..بس لا فى فرق فعلا
من عنوان الموضوع اى حد يفتكر انه موضوع تافه ..لو انه تافه فانا احب اكون انسانه تافهه فى اللحظة الحالية
الحاجات دى مش مجرد حاجات بتتفرج عليها
لو الواحد اتعمق فيها وفى المعانى اللى بتوصلها ..هتعجب اى حد الحاجات دى
الفكرة هو مش مجرد فرجة وخلاص ..
اول حاجة احب اقولها انى ادركت فعلا الفروق بين الدول المتقدمة والدول المتخلفة حتى فى وسائل الاعلام بتاعتهم
فعلا التقدم بيطبع على كل شئ
وثانيا من ناحية الموضوع اقدر اقول ان فى افلام ومسلسلات وات ايفر بقى ..فى حاجات بتتفرج عليها وتلاقيها مدتلكش اى اضافه
يعنى مخرجتش باى شئ جديد ..او مجرد عرض قصة بلا حلول ..او مجرد قصة مفرغة مفهاش حتى اى درس للتعلم
-----------
المسلسلات المكسيكية : *الاسبانية*
تابعت 3 مسلسلات للاسف .. وبالنظر لفكرة المسلسلات ..احب اقول انها لم تضيف لى اى شئ ..غير انى تعلمت بعض الاسبانية من المشاهدة ..غير كده هى كانت مجرد عرض قصص لحياة اشخاص بطريقة طبيعية ..ونفس المشاكل ..وتطويل والحلقات تمتد لاكتر من 200 حلقة .. مفيش اى جديد ..مفيش اى حاجة تستدعى لتفكير عميق ..فقط مجرد عرض يستثير غضبك فى معظم الاحيان والفرح فى احيان اخرى وينتهى بعد عذاب شهور بالنهاية السعيدة بعد حل المشاكل اللى كانت ممكن تتحل فى حلقة ..بس اهو تضييع وقت وخلاص ..سمة مجتمع شبيه :\\
المسلسلات التركى :
حاولت اتابع قبل كده بس الصراحة فاض بيا ومبقاش عندى الصبر انى اقعد اتفرج لاكتر من 150 حلقة وكمان مدبلجة يعنى حتى مفيش لغة هتعلمها كانت تصبرنى ع الفرجة ..حسيت بفراغ ..مفيش جديد نفس مثيلاتها المكسيكية ولكن مع جرعة مكثفة
من الرومانسية التى حتى لم تحركنى شخصيا !!
الهندى :
المسلسلات الهندية : تتسم بنفس الطابع التركى والمكسيكى ..لذا لامجال امتابتعها
الافلام بقى : 
اه يا سلام ..اعترف ان الافلام بتاعتهم فيها افورة شوية بالذات القديمة منها الاكشن بالذات
وفيها حب مفرط ..بس دى طبيعة اسيوية حقيقة
واعترف انى بنقى اللى بتفرج عليه ومش بتفرج على كل حاجة
اه بيبقى فى قصص عرض عادية زى ما قلت فوق بس فى وسط كل ده
منقدرش ننكر ان الاسيويين هم شرقيين ..والشرقيين عامة متدينيين وعندهم اخلاق عالية قيم ومبادئ واحترام للاسرة والمجتمع
الافلام الهندية بعيدا عن الاكشن اللى يخلى الواحد يتساءل *ياترى هما مصدقين نفسهم*هههههه
الا انهم فى كل فيلم بيوصلوا قيمة معينة للانسان ...بيتحدثوا معاك فى العميق
بيخليك تتفاعل مع اللى بتتفرج عليه ..وده الابداع والمطلوب ..حيث انك ساعتها هتفكر فى اللى بيتعمل
فى الاخر دايما الفكرة اللى بيوصلوها ..وبيبينوا تدينهم
بيبنوا حب الاب والام وبر الاب والام
وان الاب والام دوما عايزين مصلحة ولادهم وان كلامهم صح ولانهم ذوي خبرات اعلى
وانهم بيشوفوا حاجات يمكن انا لصغر سنى وضعف خبرتى ممكن مشوفهاش ..بس الحاجات بتشجع الانسان على طاعة الوالدين
غير انك بتطلع ع دولة ليها حضارة ..اتعلمت هندى من الافلام ..عرفت تفكير الناس دى
واللى حببنى فى الاتجاهات الاسيوية اكتر هما تقاربهم لينا فى حاجات كتيير
وغير طبعا ان الفيلم الهندى بيضم كل قصص الدنيا مع بعضها بتحس انك خدت جرعة عميقة من احاسيس مختلفة
نوع مختلف ..مفيش حاجة بتتعاد فى افلامهم  ..دايما فى ابداع
دايما بينشروا القيم الطيبة ..اهمية الاهل والاصدقاء وانهم مش حاجة تتباع فى اى لحظة
والدين طبعا لام تتمسك بيه  ..
حاجات عميقة تستشعرها وانت بتتفرج ..مهما اتكلمت مش عارفة اوصفها
طبعا غير الجوانب الاخرى العادية التغيير فى قصص المختلفة واللى دايما بيبقى ابداع وبطرق مختلفة ..حسيت انهم
بيوسعوا الابداع الشخصى والفكر الخاص بيا ..عامة الشرح وافى .. وطبعا فى افلام هبلة ..بس حتى فى الحاجات الهبلة ليها رسالة ^^
والافلام الاكشن القديمة هى احسن شئ يضحك الواحد لساعات متتالية بلا زهق ..عشان كده كنت اتفرج عليها مخصوص ههههههههههههههه
وحشنى الافلام الهندى بقالى فترة طويلة مبتفرجش على حاجة للاسف ^^
اليابانيين *كائنات مش زيينا* ناس معدييييييييييييييين 
لو فى يوم فكرت تتابع حاجة يابانية فعليك وعلى الانمى ..لان بعقلية اليابانيين المتطورة ..عقل الانسان هيستوعب الحاجات دى كانمى فقط لكن كاشياء مجسدة فى اشخاص ..الى حد ما صعب ..!!!
من تجربتى الشخصية ..الافلام بتاعتهم كنت شفت فيلم الصراحة حسيته اوفر ..برغم انهم داخلين فى حتت روحانيات عالية ..بس معجبنيش ..برغم انى من عاشقين اللغة اليابانية سمعا ..بحب اسمعهم اوي ^^ والصراحة مبقتش قادره اشوفهم بنى ادمين ..ممكن اشوفهم كانمى بس
المسلسلات ..واللى معظمها بتبقى مبينة ع الانمى اللى عملوه .فطبعا بيقلدوا الحاجات اللى فى الانمى ..واللى اصلا طبيعيا مش مستوعبة ..والصراحة بيبقى شكلهم ..سيس اوي ...حاجة لم اتحملها انا شخصيا انى اتابعها ..برغم انهم يحققوا الارقام القياسية فى حلقات مسلسلاتهم اللى دايما من 9 الى 13 حلقة ..الى انى مفيش حاجة بدأتها وكملتها
الانمى :
عالم رائع خيالى ..ابدااااع ..فى حاجااااات كتييرة ويمكن اقول دى احسن حاجة الواحد يتقبلها من اليابانيين بافكارهم المتجددة دوما واللى مهما فكرت مش عارفة بيجيبوا الافكار دى منيين ..الناس دى غريبة بشكل ..عاجبنى عامة ..دولة ممتازة
برده مش بيكرروا الحاجات دايما فى جديد فى كل حاجة حتى اساليب المفاجأت متجددة ..فى كل الجوانب المختلفة
فى كل شئ ودايما بيوصلوا نفس الحاجات زى الهنود ..الاسيوين عامة نفس الاتجاه وهم الاقرب لينا بكتييييييييييييييير ^^
وانى خدت خطوة بداية الانمى من عام 2008 واول انمى هو كان vampire knight
ولحد دلوقتى ويمكن متفرجتش كتيير زى مدمنى الانمى ..بس الحاجات اللى اتفرجت عليها حلوة ..خلتنى فكرت فى اشياء وتعمقت فى اشياء وتوصلت لاشياء ..يمكن الحاجات الاسيوية هى اكتر الاشياء اللى اضافتلى الكتيييير وعلمتنى الكتيير
دا غير انى اتعلمت يابانى ^^ وهكمله فى كورسات اما اخلص ان شاء الله ^^
الكوري ^_^ احبهم الى قلبى اكتر من السابقين كله
انا مشيت بالعكس من اقل حاجة بحبها لاكتى حاجة بحبها ... والانمى والكورى هما اكتر الاشياء ليا .. بس الكورى اكتر
نظرا لما تعلمته وعرفته وسبته فى الاخر لان الكلام مش هيخلص فيه ..
بدايتى الكورية فى عام 2003 اواخر هذا العام واوائل عام 2004
اول تجربتين كوريتين ..اعتبرهم بداية لفتح هذا العالم ..
قديمة انا ههههههه تابعت من ايام ماكان ال LG
هو فخر الصناعة الكورية ..لحد اما بقى ال سامسونج هو الفخر دلوقتى ^^
الكوريين اسيوين ..نفس القيم اللى بعثها الهنود ..نفس كل شئ وبزياده
انهم فى بداية متابعتى لمسلسلات فى الاول ..كانت كلها نهايات ليست سعيدة
دايما عايزين يوصلولك فى نهاية المسلسل بجانب الاسرة والاصدقاء و..و...كل ما هو جميل
ان الدنيا مش مكاننا ..واننا هنكمل حياتنا فى الحياة الاخرى ..بعد الموت
ناس بتتعمق فى وجدانك وفكرك بطريقة مختلفة ..دايما عندهم رسااالة ..بيعالجوا قضية وقضايا ..نفسية اجتماعية
ايا كانت بيعرضوا كل حاجة وبيخلصوها سواء فى نهاية سعيدة او نهاية حزينة ..فى الاخر
بيوصلك العديد من الافكار الللى هتفتحلك مجالات التأمل والفكر مع نفسك لحد ما توصل لحقائق متعددة
لان المسلسلات الكورى عمييييييقة جدا من كل الجوانب اجتماعيا حتى فى الحب ..فى كل شئ
مفيش حاجة اوفر ..كله باعتدال ..وغير ظهور جوانب لهذه الدولة وللاشخاص ..وضرورة الصدق وعدم الكذب
ودوما التذكير بان الانسان السئ نهايته سيئة والخير ينتصر فى النهاية ..ومن يفعل الخطأ سيعاقب من الرب
المميز ايضا ان المسلسلات الكورية حلقاتها مش كتيير يعنى الغالبية 16 او 20  وفى ساعات 15 وفى 24 او 25
وبعض المسلسلات التاريخية اللى ممكن تبقى 50 ومسلسلات قصيرة 129 حلقة
المفضل ليا مابين 15 -25
الحلقة بتبقى ساعة وشوية .. بس مليانة مليانة ..بدون افتعال مشاكل وفى حالات ان الناس اللى حواليك كل الناس كويسه
قضايا كتيير ومفيش حاجة متكرررة ..دايما فى ابداااع ..حاليا مالو لعمل النهايات السعيدة
وده اللى خلاهم بقوا احسن كتيير لان كنت زهقت من الكأبة الصراحة ..
يمكن من اعمق الاشياء اللى ممكن تمس داخل واعماق اى شخص ..فقط شاهد بفهم وبعمق
العمق اللى بتحس انهم بيعبروا عنك ..تحس انهم زيك ناس مش غريبة كانهم احنا بالظبط
ودى حاجة لاحظتها فى كل الحاجات الاسيوية ..قيم ومبادئ ..عندهم بعض الاخطاء
بس نفس تعليقات المجتمع سواء عندنا او عندهم تحس اننا سواء
اللى عاجبنى ان ناس زيينا وشبهنا فى 90% من الاشياء ان مكنش اكتر
دى اكتر حاجة تشجع الواحد على انه يتفرج ع الحاجات دى ..بعمق الدروس اللى بتعطيها للفرد
بتتفاعل عقليا وفكريا ونفسيا مع المسلسل ..بيضيف لك الكتيير
اشكر المسلسلات الكورية لان فعلا كان ليها اثر كبيير فى حياتى اتعلمت كتيير خلتنى افكر اكتر من اللازم لحد ما جوعت
بس برده وصلتنى لحاجات كتيير .. لو خيرونى بين التركى والكورى
الكورى احسن بكتيير مش فرجة وبس .. حتى لو الناس شايفنه حاجة غريبة هو مش حاجة غريبة
يكفى اتعلملك لغة ..كانك بتشوف ناس من دولة اخرى من غير ماتحتاج تسافر
ويمكن الناس تقول انهم شبه بعض
خدوا عينى شوفوا بيها انا شيفاهم ناس طبيعين اوي زيينا ..الاختلاف ان يمكن جفنهم مش واخد كرف زيينا
ومفيش كرفات فى الانف ..ملامحهم مش متحددة يعنى ..بس مش شبه بعض ..وكل واحد منهم ليه شكل مختلف تماما
وصوت مختلف تماما وحلوين بردو
انا حتى بفكر اتجوز واحد كورى XD
يمكن فى البداية الناس هتستغرب اللغة والشكل ..بس التعود بيفرق
زي اما تقابل حد اول مرة فى حياتك بيبقى ليه شكل
واما تعرفه بعد كده شكله بيتغير مبيبقاش نفس الشكل اللى شفته بيه الاول
نفس الموضوع لانى دخلت مرحلة متعمقة مش قادرة ومش فاكرة ازاى كنت شيفاهم اول مرة
وحتى اصحابى اللى كانوا بيتحاوروا معايا فى الموضوع ده ..وانهم شبه بعض
بعض حوارات عديدة ..ولما دخلوا العالم بتاعى .. هى اللى رجعت قالتلى نفس الكلام
وبعدين لقتها هى اللى بتحاور التانيين وبتقولهم نفس اللى كنت بقولهولها
الفكرة هى مش انك تحصر نفسك فى مكان واحد فى حاجة واحدة ..تحرر عقليا من قيوود الفكر
اللى ممكن تسيطر ع الانسان ..بعد التطلع على ثقافات مختلفة وبلاد متعددة
فعلا البنى ادم هو هو فى كل حته ..الحاجات الفطرية عندهم ثوابت ..باختلاف الاديان
والشرقيين هم المحافظون والغرب مش كده !!
اطلق العنان لعقلك ..تعمق فى كتب واشياء تفيدك ..الاطلاع مفيد بكافة صورة المكتوبة والمرئية
كل الحاجات دى هتساعد الانسان فى وجود نفسه
تنمية فكره .روحه ..عقله ..اعماق وجدانه
كل شئ له سبب ..كل شئ له دور فى حياتنا لمساعدتنا على ايجاد انفسنا وفهم دورنا اكتر واكتر
تقويتنا ..جعلنا الشخص الذى يجب ان نكونه
متخليش شكل او لغة توقفك عن الاطلاع ..زي برده غلاف كتاب او اسمه مش دايما بيعبر عن محتواه
ساعات كتب بيبقى شكلها ممل من بره بس من جواها تتعمق وتنبسط
وساعات كتب شكلها حلو بس مبيبقاش حلو من جواه لدرجة انه يشدك تكمله
زى الناس ساعات تلاقى ناس شكلها حلو ..بس اما تعرفهم تلاقيهم فاضيين او بيبقوا صورة مختلفة الا نادرا يعنى
وناس تانية ممكن تبقى مستقل بيهم او مستغربهم او مش حلوين بس تلاقى الناس دى هى اكثر العقليات روعة اللى ممكن تقابلها
فقط لان الناس لا تعطى للشئ فرصته ..فقد يحرمون من روعته
فلازم الواحد يقوى روح المغامرة ويجرب الحاجات التانية
بشر برده وليهم افكار .زيينا وشبههنا ..بس واصليين اويي ^^
دى الخلاصة برغم انها طويلةههههههههههه .وفى تكملة لاجزاء اخرى عن مغامرات ودروس الكورية ^^
االفكرة مش تشجيع الناس على انهم يتابعوا هذا اللون
فقط سأنشر ما تعلمته وما وصل لى من ما شاهدته من تلك المسلسلات او اى شئ ^^
حقا شئ لا يمكن نكرانه ^^
يكفى السعادة التى اشعر بها لما بتابع الحاجات دى :)