الزواج - مابين الهري والهري الأخر - اهري

 البوست ده متأخر جدا مكتوب من 15\1\\2015
والتعديلات عليه تمت اليوم
البوست ده رقم 444 وهو رقم مميز يحمل رسالة
(اخر شئ كنت تفكر فيه او اخر شئ فعلته لائق وصحيح ويتماشي مع دربك ومسارك فى الحياة ):D

بداية مش عارفة أبدأ منين ، بس البوست ده بقالى شهور عايزه اكتبه عشان كم الاستفزاز ف البوستات فى كل مكان
عن الجواز وتجهيزاته وما الي اخره
بما أن كله بيتكلم  ، جت عليا انا مثلا :D
كله بيتكلم من نفس النقطة ، ألا وهى ان اهل البنت هما البعبع اللى عايز يشفط فلوس أى عريس
او انهم بيبصوا للفلوس وبس
انا مش هنكر احتمالية وجود ناس كده ، بس الناس دى لو موجودة بيبقى باسباب يعنى واللى هى كلها حاجات تبع التقاليد والعرف المتعارف عليه فى البلد بتاعنا
 1
أحب أنوه لأى انسان فاكر ان فى أى جواز فى العالم ببلاش يبقي بيحلم وبيتوهم 
لأن كل دولة ليها تقاليدها واعرافها فيما يخص شأن الافراح والتجهيزات وخلافه
دا فرح ياخوانا ، واحتفال ببداية حياة اتنين مع بعض :D
انا فى مرة كنت ببحث مش فاكره عن ايه ووقع مقال أدامى لواحد اجنبي وكان بيتكلم عن ليه نسب الجواز عندهم بره مش كبيرة  ، المهم بعيداً عن كل رغيه واللى بيثبت اننا كبشر ايا كانت جنسياتنا واحد
ان حفلات الزواج مكلفة للغاية عندهم وبيوصل ساعات ل 20 الف دولار.. والموضوع مرهق لان لازم يهتموا بكل اقارب الزوج والزوجة من كل جانب ويهتموا بانهم يبعتوا حاجات وخلافه - فوككم من جو الافلام واللى الناس بتجبلهم هدايا كبيرة وده بيحصل لو هما اساسا محتاجين - وده اصلا بيحصل فى مصر علطول هتلاقى عم الواد الفلانى جبله هدية تلاجة واللى جبله البوتجاز واللى جاب المروحة والدنيا بتمشي وبتكمل وبيلاقى كل حاجة كملت من المجاملات بس حصل وادامى ومش مرة واحده بل تقريبا علطول اصلا انا بتكلم دا كمواطنين ف مصر
بيحصل .
الاسيوين عامة هما الاكثر صرفاً فى حوار الفلوس والدهب ..قارة لطيفة
شوف الهنود اللى بيحتلفوا بالفرح من قبلها باسابيع  وكان ليا صديقة عاشت فترة فى باكستان وليا اصدقاء من باكستان .. الدهب عندهم بالكيلو .. بتلاقى العروسة مش قادره تمشي من الدهب :P
وبعض الدول العربية بردو :D 
وطبعاً طول الوقت هدايا من الطرفين لبعض .. وده بيحصل عندنا برده
حتى فى كوريا هناك لما واحده هترتبط بواحد بيبقى فى مواسم ولازم الهدايا توصل أول بأول من كلا الطرفين ..دى أسر بترتبط ..مش ناس بتلعب .. وده برده بيحصل بس احنا بنحب نتريق
لو بصيت فى اى دولة ف العالم ..الجواز مش سهل ..ماهو طبعاً لازم ميبقاش سهل ..
لانها شئ سامى جداا ..ولو كان سهل مكنتش هتبقى عيشه اصلا ..لازم نتعب
ممكن نتعب نفسنا وندور ع الجواز ف العالم ونفكنا من هبل انه خاتم والدنيا بتمشي ..عشان انا مشفتش اعبط من كده ف حياتى ..
2
لو هنتكلم فى شرع ..العروسة معلهاش حاجة الا شنطة هدومها وتيجي زى الملكة على بيتها
وهتلاقى فى دول عربية دا نظامها ..ويمكنك البحث ايضاً
المهر والفلوس اللى بتدفع دا شرع مفهوش نقاش بس احب أنوه لانك ف مصر فى نعمة كبيرة قد لا تدركها.. فى مصر ..محدش بيدفع مهر دلوقتى
المهر تم استبداله بما يسمى بالقايمة .. تانى ..مبقاش حد يدفع مهر ..فعشان كده تم كتابته قايمة
الفكرة كلها ان البنت المفروض متدفعش قرش وزمان فى العصور القديمة كان بيتقدملها مهر ..المهر ده بتجهز بيه نفسها ودا شئ معروف جداا منذ قديم الأزل
انا مبتكلمش فى قيمة مهر كبيرة ولا صغيره ، أد ما بتكلم عن فكرة المهر نفسه
محدش بيدفعه لان الغالبية العظمى ع ادها دلوقتى والعقدين الماضيين ..فبتقوم العروسة بتساعد مع العريس
اه والله مشفتش حد مساعدش الصراحة يعنى فى كل اللى اعرفهم ف حياتى
ايوه بتساعد العريس يعنى بتشتري حاجات وبتجهز معاه وده بقى اللى بيتكتبلها ف القايمة
لانها اساسا حقها ولانها دى فلوسها وبيتكتبلها ما يساوي قيمة ما دفعته ف التجهيز
عشان منقعدش نرغي كثير
المؤخر دا شرع ملهاش بقى فى كلام وفتى ..بتختلف ارقام ..بس
 الحكاية مش حكاية واحده عايزه تشفط فلوسك بمهر وقايمة و..و..و...الخ
وهقول امثلة كتير على كده
- تفتكر ليه ف واحد ف الجامعه بيخطب زميلته
تفتكر انه جاهز مثلا فاهلها مقدروش يرفضوه ؟؟
لان ده اللى بنتهم عايزاه فخلاص ..معظم الاهالى اصلا عايزين يطمنوا على بناتهم
وانا شايفه انهم بيخففوا على اد ما يقدروا بس للاسف مفيش تقدير
ولا الولد اللى داخل الجيش ولا الولد اللى لسه متخرج وخطب ..واساسا بيبقى خاطب بدبله ومحبس ..يعىن مش اختراع ولا الاهل قالوا شبكة ب 50 الف ولا الكلام الفاضى الل الناس بتروج له
لان الغالبية دلوقتى بقت بتكتفى بده بس
واحب أنوه أن الدهب مفيد جداً للمرأة فمحدش يستخسره اصلا فى اللى بيحبها #
وكل اللى اعرفهم حواليا محدش طلب شبكة بالقيمة الفلانية ..لان الشبكة دى هدية العريس وبتاعته
  اصلا كده كده
والناس اللى فعلا بيشتروا بارقام عاليه بيببقوا شارينها باختيارهم ..اه والله محدش غصبهم على حاجة
وفى ناس فعلاً بيبقى مهم بالنسبة لهم برده لانه نوع من مظهرهم ادام الناس ازاى يجيبوا دبله ومحبس بس ازاى  !!
العيب فينا كبشر
3
النيش واللى جابوه .. النيش اصلا غصب هو جزء من السفره ..
الكلام برده اللى مورهمش غيره ع اساس اهل البنت هما اللى مصرين عليه
الموضوع اكبر من كده ، لان كل ولد بيتكلم من فكره لوحده ...من غير ما يشوف اهله هيعملوا ايه
نيجى انا ميفرقش معايا ولا احبذه بس عادى مش فارق معايا يعنى اهو مجرد دولاب هيلم الدوشه اللى المطبخ مش هيشلها ..ببساطة يعنى
اهل العريس هما اللى قالولنا ..والنيش اهم حاجة متنسهوش ، لما كنا بنتفق
ايوه هو بنفسه واهله بلسانهم اللى قالوا لا النيش اساسسي والكلام ده عشان الاهل لما يزورونا
مجتش مننا خالص ..والموضوع ده بيحصل عادى ..لايكونوا مفكرين ان البنات داخله حرب
الفكرة ان البنت والدتها بتبقى شاريلها حاجات مفيش اى مطبخ ف الدنيا هيشيلها فعشان كده فى اختراع البوفيه والنيش عشان يساعد ع الشيل ..هتقولى وبيجيبوا حاجات كتيرة من الاول ليه
هقولك اصل الام مش بتجبهم مرة واحده ..تخيل كل سنة بتقابل حاجات وتشتري وتقابل وتشتري وهكذا لحد ما يجي اوان البنت وهتتجوز بيبقى اتجمعلها حاجات اد كده ..مش الام بس دا كمان صحاب الام والقرايب وكل من يعرفهم فى اى مناسبه هدايا للبنت للجهاز ..مما يخلق الكثير من الاشيءا اللى ليها لازمة وملهاش ..هو مش بتبقى شاريه كذا قصد ..اللامور بتمشي لوحدها فى طريق غريب
ومرة تانية برده اهل العريس بلسانهم ..كل ما يجو لازم يذكروا النيش عشان ناخد بالنا ونجيب الاطقم الجهنمية ..لحسن اهل الواد عمته وابن عمت ابن خالت ابن مش عارفة مين اللى جايه
عشان يلاقوا حاجة يتفرجوا عليها ..حصل ..هما بنفسهم اللى بيقولوا مش اهل البنت بس اهه ..اهو اهل العريس برده ..وبعدين الواحد بيحس بسخافة  يعنى مثلا
يعنى هما مش لاقيين يتفرجوا ع حاجة وجايين يتفرجوا عندنا .. وبعدين ملهاش لازمة نرمي ع بعض عشان احنا كلنا مصريين وللاسف معظمنا سطحيين ومنظرنجية ..بتوع مظاهر .. الواحده تقولك اصلى لازم اجيب الطقم الكاسات ابو 400 اومال الناس تقول انا اقل من فلانه ولا غيرها ..بتحس ان ف منافسة فى اللاشئ ..
يعنى الواحد بيرمى فلوس فى شوية رمل متصنع :D
يعنى من الاخر المشكلة مش ف اهل عروسة ولا فى اهل عريس المشكلة فىينا احنا كمصريين الصراحة
وللاسف الموضوع ده هتلاقيه بيتكرر فى دول كتير
بيبقى فى حاجات كده ملهاش لازمة بس بنعملها كنوع من انها جزء من الاسلوب المتبع فى الامور دى
4
حاجات تانية زى النيش ..يقولك اوضه الاطفال ..
انا شايفه ان ملهاش لازمة تتجاب اصلا او نخلي الاهل يجبوها
وبعدين تبقى اوضه عادية بعدين لما نتجوز ويجي الاطفال نبقى نفكر نجهزلهم اوضتها
مش شايفه اى لازمة ليها اننا نلزم الاهل بيها او حتى نزحم اوضه بيها والاطفال بيكبروا يوما ما
مش لازم يبقى اوضه اطفال عشان هتروح فين بعد كده وبعدين احنا مش في فيلم عشان عايزين نصور الاوضه مثلا ..دى من الطلاسم بردو ..واحنا رفضناها فى زواج اختى ..اهل العريس هما الىل كانوا مصممين واحنا رفضنا المبدأ ومجبناش الاوضة والحياة مشيت عادى برده ...
احنا اللى بنحب نأفور كمصريين
محدش قال لازم تبقى الشقة كاملة اويي ولا تبقى شقة 21291829392 متر2
محدش قال الحاجات دى كلها ومحدش بيتكلم فيها ..انا الشقة اللى كانت هتبقى  شقتى كانت صغيرة جداا ومتضايقتش من كده مزعلتش ان الشقة مكانها بيئة يااااي ازاى اعيش هنا لازم اعيش فى مكان من اللى بيتعرض ف التلفزيون ..لا -__-  ..لان عادى الشقق واى حاجة فى الحياة ممكن تتغير ..الا الانسان اللى هتتجوزه دا الحاجة اللى لازم تنقيها صح لان دى بجد اللى مش هتتغير
متختارش انسان اوانسانه لمجرد انه متماشي مع ظروفك ..اختار الانسان الصح
اللى تكمل معاه حياتك ..
موضوع الشقق عشان لما نزلت شقق اللى قعدوا يتريقوا عليها بردو ال 60 متر باينى ..
مش هقول غير حاجة اشمعنى فى الدول الاجنبية و لما بتعيش بتعيش فى استوديو من 40 ل 50 متر ومبتتكلمش وبتبقى مبسوط ..دلوقتى مين اللى بيتأمر البنات بردو ولا الولاد!؟
الناس بره بتبقى حياتها فى المساحات الصغيرة لما يبتدى يخلفوا ..ساعتها بيبتدوا يدوروا ع منزل يكفيهم
اشمعنى بنبص لبره فى حاجات وحاجات لأ؟
عشان احنا اوفر وبنحب نأفور أى حاجة فى حياتنا
اومال نعيش ببساطة ودى تيجي :D
5
الواد اللى فاكر البنت مبتشاركش فى اى حاجة  ..هو ولد فعلا لان كل اللى بيفكر بالاسلوب القديم هو موصلش لمرحلة انه يكون كبير    .
  ..

فعلا لو كنا فى زمن غير دلوقتى من قرون كنت هتشيل فعلاً

بس دلوقتى معدش فيه الكلام ده دلوقتى
دلوقتى واغلب الناس بقت بتقسم 50-50 الحاجة يعنى انتو عليكو النص واحنا النص
فى الفرش وكله حاجة وحسب التظبيطات والاتفاقات لان كل اهل غير التانين وكل واحد مقدرته مختلفة
هيجي يقول ياعمى انا مقدرتي كذا ..هيقولك مفيش مشاكل وتتفقوا والامور بتمشي
مش الحكاية الهلامية ولا المعضلة اللى هدت الكون
اها والله فى ناس زى الفل بيجى يقولك ياعمى انا مقدرتي كذا  وهجيب شبكة بكذا وهعمل كذا .. خلاص دا انسان واضح ووضح نفسه وهو اللى قال هيعمل ايه محدش غصبه ولا قاله حاجة
فمينفعش نقعد نقارن نفسنا بغيرنا ، لان كل واحد وظروفه من الاخر يعنى
ومش لازم تدوس ع ظروفك عشان تبقي زى حد
6
الفرح ومابين هنعمل فرح ولا لأ
انا بقى مع الفرح جداا
وهوجه منعملش فرح والهبل ده هى اللى خلتنا اساسا مش فرحانين
دا يوم لذيذ ف حياة المعنين بالامر ..والناس بجد بتفرحلهم
سيبنا من جو الناس اللى هتبصلك ولا تنفسن عليك ..جو fake اوي
محدش بيقولك اعمل فرح ب 100 الف ..الافراح من 5000 وانت طالع وكل واحد ومقدرته
مش لازم تقلد فلان الفلانى ..كل واحد ومقدرته وظروفه ودى حاجة مبتشابهش حد
بس متجيش تقول مش هعمل فرح
الفرح والله حاجة جميلة جداا بالذات لما يبقى بتاعك غير لما تروح افراح غيرك
تجمع كل اللى بتحبهم فى مكان واحد واحتفال
وسيبك من جو الحاجات اللى بتتعمل  فالافراح ..لانك لو جربت تحجز فرح هتكتشف انك انت اللى بتحدد كل حاجة مبدأيا من اول العزف الاولانى والزفة لحد الاغانى اللى بتشتغل ف الفرح ايوه انت اللى بتحدد كل ده ..بالاضاءات بفرش الكراسى بالدخان حتى  ..والكوشه بكل حاجة انت اللى بتختارها ..فمحدش بيغصب ع حد حاجة
هى فى ناس بتكسل تختار او تحدد اللى عايزاه فبيبقى فرح شبه كل الافراح
بس عادى فى النهاية كل واحد بيبقى فرحان ف فرحه وطز ف اللى ميعجبهوش ولا اللى مش عاجبه شكل الفستان ولا ميكاج العروسه ههههههههههه
نعيش حياتنا ونسيب السلبييين ينقدوا زى ماعايزين بقى ^^
اصل دى حاجة مبتتكررش وهات اى حد عمل فرح وقوله لو رجعت الايام هتعمل تانى هيقولك اه وكل حاجة خطوبة وكتب كتاب وفرح وحنه وكل حاجة هيعملوها من الالف للياء
لما الفرحة تجيلك عيشها بضمير بجد
وكل حاجة بتتحل والله ومش ده اللى هيفقرك ^_^
7
 اخر حاجة فى دماغى حالياً بخصوص الحوار ده كله
ان لما انت كرجل ونيتك خير وبتحب واحده ونفسك تتجوزها اتقدملها
سيبك من فكرة الفلوس وخلافه
كل واحده بتيجى برزقها وكل مولود برزقه
نيتك السليمة الكويسه دى هتبص تلاقى ربنا سهل لك كل حاجة
وهتتفاجئ
بس هى كده اللى نيته خير وعايز الخير وبيسعي ربنا بيقف جنبه وبيرزقه
حتى هتلاقى ناس لحد دلوقتى تقول انا هجوز ابني عشان ربنا يرزقه اكتر
وفعلا ربنا بيفتحها عليه من كل النواحي ،ولما بيتولد مولود
بيفتح حاجات تانية ..حصلت كتيير اويي وبتحصل كل يوم
..مفيش حاجة بتوقف الانسان غير خيالاته
    واللى بيدخل له منها الشيطان
مش عشان كام قصة محبطة ولا الناس اللى بتأفور فى حياتها والبؤس 
والله بيبقى اختيارهم وهما اللى عاملين فى نفسهم كده او خايفين من العين
اللى اعرفه ان السعادة اختيار واحنا فى اى حاجة فى حياتنا بنقرر هنستقبلها بايه بسعادة ولا بقلق وحزن
احنا اللى بنحدد شعورنا ..
بس لازم نفتكر
( تفاءلوا بالخير تجدوه
ديننا سهل لنا كل حاجة من الفرح والسعادة للتفاؤل وحسن الظن بالله ...  
اصبر هتؤجر وتفاءل واحسن ظنك بالله والجزاء الحسن لكل ده
مفيش سبب يخليك تشيل هم او فكره حاجة ..توكل على الله واعمل اللى عليك
وربنا هيسهل لك الخير فى امورك وامورك كلها خيير
حتى لو بتحصل حاجات معجبتكش ..بتبقى خير ومش لازم تعرف سببها دلوقتى
فى حاجات هتكتشف سببها قدام او  حتى لو متكتشفتش
لانك لازم تسلم امورك لله وواثق تمام الثقة ان ربنا هيوصلك للى انت محتاجه واللى انت عايزه
ربنا رحييييييم اوييي بينا
(انا عند ظن عبدي بي إن ظنَّ خيرًا فلهُ وإن ظنَّ شرًّا فله  )
احنا كلنا عارفين الكلام ده وحافظينه تمام بس مبنطبقوش صح للاسف
الزواج حلو ومفيد وسنة الحياة متخليش حد يسد نفسك ولا يقرفك بمشاكله ولا بفلوس والله الفلوس بتروح وبتجيى بس الانسان الكويس مبيتعوضش،  اوعي تفقد الثقة بسبب ناس
فكر كده انه يبقالك شريك يبقى اقرب حد ليك بتعررف تكلمه وتناقشه فى كل اللى انت عايزه
 بتحس انه مرايتك ..حد مش هيفهمك غلط
و انك تبقى تبقى مسؤول عن مملكتك الخاصة بيك
فى حاجات كتييير حلوة اويييي وانت اللى بايدك تختار سعادتك او خنقتك مدى الحياة
المهم تسعى وتسيب الباقى على ربنا وربنا هيوفقك للى فيه الخير ليك ^^
 وهيوصلك لانت اللى فى مكان اخر
ربنا يوفقنا للخير جميعاً فى كل امور حياتنا ويحققلنا احلامنا كلنا ^^
♥