اليوم ...

اليوم كان عندى كويز استراكتشر
لم اذاكر كالعادة ..
لا ادرى ماذا اصابنى اصبحت انتظر لاخر لحظة
ولكن اليوم ذاكرت قبل السكشن بشوية
والحمدلله لانى كنت بأكد مع صحابى فففهمت بسرعة
بس بقى دخلنا الكويز كان نصف ساعة
انا كان كل تركيزى انى اخلص بسرعة عشان اروح سكشن الاستيل
ولو ان الكويز بدأ من 2 وربع وكان نصف ساعة
حليت بسرعة والمشكلة واللى ضايقنى واللى سرعنى اكتر
كان فى واحدة جت قعدت جنبى ..انا اعرفها
فقالتلى انتى عارفة هتعملى ايه ؟
قلتلها اه
قالتلى خلاص هنقل منك
الصراحة انا اتضايقت ومكنتش حبه كده وفى نفس الوقت مش عايزه اكسفها
بس للاسف كل اللى قلتوهولها
بس انا مش ضمنه نفسى فى الحل وكده
انا نفسى مش واثقة فى نفسى
قالتلى مش مشكلة 
المهم قعدت احل وركزت فى ورقتى بس ومبصتش ناحيتها
حتى اما كانت بتكلمنى وبتستفسر عن حاجات
مكنتش برد عليها دايما
حتى البشمهندس خد باله بس متصرفش
مش عارفة هل ده تصرف سلبى منى ؟؟
اللى ضايقنى مش انها نقلت بس
دا كان في جنبها بتاع 3 بشمهندسين تانيين وكله بينقل من بعضه
انا اتغظت واتضايقت بس فى نفس الوقت مش عايزه اعمل تصرف كده ولا كده
قلت فى نفسى هخلص بسرعة وهمشى وخلاص عشان
انا اتضايقت والصراحة الموضوع اوفر ومش عارفة اعمل ايه
*عارفة طبعا انى غلطانه وياريتنى سمعت كلام مياده لما قالتلى نقعد قدام *
حسيت انى بقى بدفع تمن سكوتى
فقلت هشوف مياده خلصت ولا ..مياده بططيئة شوية .. وانا مش هقدر استناها اكتر عشان الناس اللى بتنقل
انا اكتر حاجة ضايقتنى
انهم بينقلوا الكويز
على الاقل محاولوش يشوفوا فى الوقت الفاضى اللى كان عندهم
يبصوا ع الورقتين
انا اصلا محضرتش فى ميعاد سكشنى عشان انا كنت بكمل شيت الاستيل وبعدين بصيت فى ورق لاستراكتشر
وكانوا كام ورقة بالعدد بتاع 4 او 5 ورقات مش حاجة يعنى والموضوع مش كبيير
عشان كده حضرت السكشنين ال4
اللى غظنى انهم من السكشن بتاعى وحاضرين ال4 ....اول حاجة كانوا بيعملوا ايه قبلها
انا عن نفسى لو مكنتش مذاكرة كنت ببساطة هكتب اسمى على الورقة واسلمها
بس
لكن عمرى ما اتذل لحد او انى اغش لانه حرام اولا وقبل كل شئ  وفى الاخر اذى ليا وللى بنقل منه
دا غير انه وانا مبثقش فى حد
دا اسلوبى فى الحل ..حتى فى امتحان الميدترم بتاع الستراكتشر
الورقة الاولى كانوا 3 اسئلة نظرى
مكتنبتش حرف فيهم لانى معرفهمش
ولا اميل الى التأليف والفتى فى اللى معرفهوش
حليت المسألة بس
ومش ههمنى الدرجات
من الاخر المبادئ لا تتجزأ
يعنى مش على كام درجة مش هيفرقوا معايا كتيير
اتخلى عن مبادئي ..لا
 وحتى لو هيفرقوا لازم اعلم نفسى الادب
عشان تلم نفسها وتذاكر بعد كده كويس
دا يعنى لو نفسى كانت زعلانة اوي
انا مش من الناس اللى بتخاف من الامتحانات
ومش من الناس اللى بتزعل من الامتحانات
لان ببساطة انا شايفة ان كل الامتحانات سهلة
واننا احنا الطلبة اللى اغبيا ..
للاسف كل الامتحانات اللى مرت عليا كانت حلوة وسهلة لو طالب مذاكر كويس جدااااااااا
هيحل ويقفل كمان
لكن عيل مستهتر كده او ناس مبتذاكرش زىى
اخرهم يعدوا والسلام
بس انا اللى مش بذاكر بمزاجى ..
ومش بطيق اقعد كتيير فى اللجنة
وبحل اللى اعرفه واخرج
وساعات لما بزهق وساعات بكسل اكتب
وساعات ببقى عارفة الصح بس مبغيرش الخطأ كسل يعنى
لان فى الاخر عندى ايمان واحد جوايا
انا جاية اتعلم قبل كل شئ وقبل حتى الدرجات والامتحانات
مش اهم حاجة انى ابقى عارفة الصح
خلاص انا عارفاه
بس مش لازم اكتبه يعنى
:))
ههههههههههههه غريبة اوي صح
مش عارفة الناس ايه النقطة انى ابقى جايبة درجة عالية
وخصوصا الطلبة اللى بتخاف من درجات الغياب والكويزات
انا ياما فوتت الحاجات دى
عادى يعنى..انا وظروفى ساعتها
وياما خدت زيروهات
وياما محلتش وسلمت ورق فاضى
معنديش ادنى مشكلة
بس دائما ابدا ..مش الدرجات دى اللى تخلى الواحد يغش
وانا شايفة ان الغش فى اقل الحاجات بيتطور بعد كده واحدة واحدة وبيوصل لاكبر الحاجات
وكل ده بيحصل واحنا مش واخدين بالنا ..
ربنا يهدى الجميع ..:)
دى مجرد وجهه نظرى  بس مختصرة يعنى فى الموضوع ده :)
والله وبرغم ان ناس كتيير بيقعدوا يقولولى  ويتحايلوا عليا
عشان الدرجات لا عيدى الكويز ..اعملى مش عارفة ايه ..احضرى..روحى لمين
انقلى يابنتى
افتحى الكشكول والكلام ده
بس انا دايما ثابتة على اتجاهى ومش بغيره
والحمدلله ربنا بيجازينى خير
وبنجح وبجيب اعلى من تخيلاتى لنفسى :))
الحمدلله على كل شئ :)