لعبة الذاكرة ^^ انا كسبتتتتتتتت

خلال الاسبوع الماضى حدث شيئا ما :D
وكان نتيجة لشهور ماضية مش فاكره ابتدت من امتى بس يمكن يكون شهر 2 كده او شهر 3
اختى قالتى ان ف مسابقة فى صفحة برجوا باريس  وبعدين اتناقشنا ان مفيش حد بيكسب اصلا
وبعدين فى اليوم هما دقيقتين لعب فقلت دقيقتين يعنى مش تضييع وقت زى اللى بنضيعه ف اليوم مثلا :D
والواحد مش خسران حاجة يعنى من اللعب لو كسبنا خير وبركه لو مكسبناش ادينا بنتسلى دا غير ف الحالتين الواحد بينشط ذاكرته
كان عندى هوس رهيب فى خلال اول شهر وبلعب من عندى ومن عند اختى مرتين مش كفاية ان اجيب اسكور كويس :D
بعد ما بدأت بشهر بدأت العب من عندى بس ومبقتش العب لاخواتى
كان كل فكري ياترى هنكسب ولا لأ حتى كنت اما اكلم اى حد وادخلوا العبوا يقولولى هو الموضوع حقيقى
اقولهم معرفش بس شكله حقيقى ..يقولولى ماشى اما تكسبى ابقى قوليلنا
المهم محدش بيصدق ف الحاجات دى
وانا نفسى كان دافعى الدائم عايزه اعرف الواحد ممكن يكسب فعلا ولا لأ ؟؟
المهم من بعدها خلال الشهرين بقى بقيت بفوت ايام مبلعبش فيها وكنت بطلع من ال10 الاوائل بس مطلعتش من ال3 الاوائل ههههههههه
وفعلا فى خلال الشهر والنصف الاخرنيين بقيت بطلع من ال3 الاوائل بس ع اخر الاسبوع ببقى فى المركز ال4 يعنى مش كسبانه
المهم بطلت مبقتش العب بتاع اسبوعين كده بقيت العب مرة ف الاسبوع او مبلعبش خالص
لعبت مرة من اسبوعين اللى فكرنى باللعبة اختى وقالتلى انها فى الترتيب الاولانى والاسبوع قرب يخلص
قلتلها مانا كنت كل اسبوع كده بس بيجى ع اخر يوم والناس تزقنى لانى مبعرفش اعلى الاسكور
دخلت لعبت بقى اخر الاسبوع اللى قبل اللى فات
فطلعت المركز ال3 ..فقلت خلاص كده نو واى انى هكسب
لعبت 3 يومين او 3 بس خلال الاسبوع اللى كسبت فيه
وقلت عادى الناس هتزقنى :D
اللى حصل ان الاسبوع خلص وطلعت المركز ال3 وكسبت فعلا ..المهم قلت يااه لان ناس كتير كسبت واتأخروا عليهم
قلت قدامى شهر ولا اكتر عقبال اما يجيلى الهدية
تم اعلان النتيجة يوم 2 يونيو
بعتولى ميل يوم 4 يونيو وخدوا معلوماتى
يوم السبت 7يونيو هو يوم حظى
اتفاجأت بمكالمة من رقم غريب فرديت عليها فطلعوا موصل البريد بيقولى ان ليا حاجات من دبى الامارات
انا ايه !!! بجد
فسألنى ع العنوان بالظبط  وطلب منى استناه بره الشارع فقلتله الكلام ده امتى ؟ وكان فى بالى يعنى على متأخر شوية ولا حاجة وطلع قريب من البيت ونزلت استنتهم بره
وروحت لهم مخدتش 5 دقايق لقتهم مستنين ف المكان بالظبط وادونى الظرف ومضيت وروحت
- اقدر اقول انها من اكتر اللحظات سعادة فى حياتى -
ان يحصل حاجة انت مش متوقعها برغم انك كنت مؤمن جدا انك هتوصلها
المهم يمكن مش زى اللى كنت متمنياه بس برده هدية قيمة ودى حاجة تسعدنى جدااا
حسيت ان فعلا المعجزات ممكن تحصل
الحاجات اللى احنا ممكن محدش يتوقعها او وممكن تبقى انت الوحيد الممؤمن بيها تحصل
انا ممكن كنت بقول للعيال صحابى كده هكسب ياختى انتى وهى ..
مع ان مكنش ف دماغى حاجة والموضوع كله هزار وبنرخم على بعض :D
لحد دلوقتى انا مش مستوعبة ومش مصدقة
بس الورق والاظرف والفاونديشن اللى كسبته يثبت انه حقيقة
حاسه انى ف حلم ..لانى مش مستوعبة ان ده ممكن يحصل حقيقى
الفكرة مش فى المنتج اللى كسبته خالص
الفكرة كلها ان ده كان مجرد حلم واتحقق
ان الموضوع ده كله اعطانى شحن كامل لبطاريتى
ان احلامى ممكن تتحقق بس عايزه اراده واصرار وايمان حتى لو ايه
الفكرة فى الموضوع ده كله ..ان كل شئ ممكن
مفيش مستحيل
متتخلاش عن حلمك مجرد انك قابلت موقف وحش او يوم وحش بالعكس حتى لو سبته ايام
بس ارجع تانى جدد طاقتك
مهما طال وقت انتظارك فى النهاية هتوصل لحلمك لما يحين الوقت المناسب
it's all about timing ^^
اللى كنت بدور عليه وبحاول اثباته لنفسى حققته
الموضوع بالنسبة لى مكنش مجرد منتج
بل كان ليه عوامل تانيى وحاجات كتير كنت محتاجة اثبتها لنفسى ولعقلى ولبعض الناس
مفيش مستحيل
^^